Мы атрымалі адказ ад Міністэрства культуры ў адказ на самую масавую петыцыю на petitions.by — 103 202 чалавекі падпісаліся ў падтрымку БЧБ-сцяга.
Мінкульт кажа, што няма падстаў для ўключэння бела-чырвона-белага сцяга ў Дзяржаўны спіс гісторыка-культурных каштоўнасцяў Рэспублікі Беларусь.
— Мае ці не мае той ці іншы сімвал гісторыка-культурную каштоўнасць, вызначаецца аб’ектыўным значэннем яго для беларускай гісторыі. Гістарычнай значнасці бела-чырвона-белага сцяга немагчыма не прызнаць. Пад ім беларуская дзяржава знайшла сваю незалежнасць, пад ім былі прыняты дзейная Канстытуцыя, пад ім прыняў прысягу Аляксандр Лукашэнка, які прайграў выбары, — каментуе Андрэй Курэйчык, прадстаўнік экспертнай групы КР па культуры, драматург і рэжысёр.
— Гэты сцяг быў на эмблемах усіх дзяржаўных органаў, на грашовых купюрах, на сувенірах і марках. Гэты сцяг пісьменнік-франтавік Васіль Быкаў называў адзіным сцягам Беларусі. Унёсак гэтага знака ў гісторыю Беларусі неацэнны. Спасылкі на канвенцыю юрыдычна непісьменныя, бо Канвенцыя не ўсталёўвае вычэрпнага пераліку аб’ектаў, якія могуць прызнавацца гісторыка-культурнымі каштоўнасцямі. Мы ведаем краіны, дзе такімі прызнаваліся і гербы, сцягі і нацыянальныя арнаменты.
Андрэй Курэйчык кажа, што спроба выкрасліць з нашай гісторыі перыяд здабыцця незалежнасці паказвае праўдзівыя адносіны ўлады да гэтай падзеі. Але беларусы ўсе помняць і ведаюць, які сцяг для іх важней і пад якім яны знайшлі волю і незалежнасць.
Апроч Мінкульта, адказ павінна даць генпракуратура і МУС.
