Дэкларацыя Каардынацыйнай рады Беларусі з нагоды Дня салідарнасці з палітвязнямі Беларусі — 21 траўня 2023 года*
Мы, дэлегаты Каардынацыйнай рады Беларусі другога склікання, у Дзень салідарнасці з палітвязнямі Беларусі, дэкларуем нашу нязменную прыхільнасць вызваленню ўсіх палітвязняў і спынення рэпрэсій.
Мы цвёрда ўпэўненыя ў неабходнасці барацьбы за вызваленне ўсіх палітвязняў і змену дыктатарскага рэжыму нашай краіны на дэмакратычны парадак, які стане асновай для свабоды, справядлівасці і працвітання для ўсіх беларусаў.
Мы глыбока занепакоеныя тым, што мноства людзей, адданых сваім перакананням, уключаючы дэлегатаў Каардынацыйнай рады, апынуліся за кратамі. Гэта сур’ёзнае парушэнне правоў і свабод, якое падрывае асновы нашага грамадства. Мы не можам заставацца абыякавымі да гэтай несправядлівасці. Мы моцна прытрымліваемся прынцыпаў абароны правоў і годнасці кожнага палітвязня, іх сем’яў, а таксама ўсіх тых, хто імкнецца да свабоды і дэмакратыі.
Мы запэўніваем, што нашая барацьба не спыніцца да таго часу, пакуль апошні палітвязень не будзе вызвалены, а дыктатарскі рэжым падзе. Мы прыкладзем усе намаганні, каб і гісторыя барацьбы з дыктатурай Лукашэнкі, і кожная гісторыя палітвязня сталі сведчаннем нашага прагрэсу, сілы і салідарнасці.
Мы заклікаем усіх беларусаў, кожнага прыхільніка дэмакратыі, не спыняцца і далучыцца да нашай супольнай барацьбы. Разам мы зможам пераадолець усе цяжкасці і дасягнуць перамен, якія так неабходны нашай краіне. Заклікаем усіх неабыякавых да лёсу вольнай Беларусі выступаць за свабоду і справядлівасць, выказваць сваю салідарнасць з палітвязнямі, падтрымліваць іх і разам дамагацца іх вызвалення.
Разам мы зможам дасягнуць пераменаў, вызваліць палітвязняў і пабудаваць грамадства, заснаванае на справядлівасці, свабодзе і павазе да правоў чалавека. Наша мэта – не толькі пераадолець сённяшнія выклікі, але і стварыць будучыню, у якой тэма палітвязняў застанецца ў гісторыі, а свабодная і квітнеючая Беларусь стане рэальнасцю для ўсіх яе грамадзян.
* Праваабарончы цэнтр “Вясна” вызначыў 21 траўня Днём салідарнасці з палітзняволенымі Беларусі. У гэты дзень два гады таму ў шклоўскай калоніі №17 памёр палітвязень Вітольд Ашурак. Крымінальная справа па факце яго смерці да гэтага часу не ўзбуджаная, а сітуацыя з палітычнымі зняволенымі за гэты час значна пагоршылася.