Канцэпцыя
Жаданне быць шчаслівым – натуральная чалавечая патрэба, магутны матыватар і аб’яднаўчы фактар для вельмі розных людзей. Усе разумеюць і дасягаюць шчасця па-свойму. Гэта робіць людзей цікавымі, моцнымі, развівае нашыя таленты і адкрывае новыя магчымасці.
Мы бачым беларусаў шчаслівай, еўрапейскай нацыяй. Мы лічым, што ў нас ёсць усё патрэбнае для гэтага: выдатны чалавечы патэнцыял, прыгожая і рэсурсная зямля (тэрыторыя), багатая гісторыя, аўтэнтычная культура і добрыя еўрапейскія суседзі.
Шчасце нашай нацыі і іншых людзей, якія жывуць з намі ў адной краіне, складаецца з вялікай колькасці розных фактараў, якія грунтуюцца на жаданні зрабіць жыццё кожнага грамадзяніна камфортным, свабодным і значным.
Доўгі час беларусам навязвалі, што мы не здольныя ствараць сваю краіну самастойна. Што нам патрэбны для шчасця больш моцны заступнік. Такім чынам, захаванне, развіццё і павелічэнне сваёй нацыянальнай унікальнасці зʼяўляецца моцным абʼяднаўчым фактарам беларусаў па ўсім свеце на шляху да незалежнай, дэмакратычнай Беларусі.
Мы верым, што беларусы створаць грамадства, у якім будуць ганарыцца i мінулым, і сучаснасцю. Грамадства, дзе ў кожнага будзе магчымасць пачуць іншае меркаванне і выказаць сваё.
Гэта магчыма, калі асноўныя правы чалавека становяцца практычнымі каштоўнасцямі дзяржавы. Тады гадуецца здаровая нацыя, будуюцца адкрытыя адносіны з суседзямі. Творчасць, стварэнне, прадпрымальніцтва і эфектыўнае развіццё немагчымыя ва ўмовах страху і гвалту. Беларусы – гэта нацыя крэатыўных, таленавітых, адукаваных і пісьменных людзей, якія хочуць жыць у свабоднай, незалежнай, еўрапейскай краіне.
Шчасце нацыі складаецца з мільёнаў асабістых гісторый людзей, якія ўсведамляюць і паважаюць уласную адметнасць і ўнікальнасць іншых. Шчасце беларусаў у нас саміх. У нашай любові да сваёй краіны і яе грамадзян, у здольнасці быць беларусам для беларусаў.
Назва фракцыі “Шчаслівая нацыя” адлюстроўвае нашыя памкненні да пабудовы здаровага, дэмакратычнага, сучаснага грамадства. Пад шчаслівай нацыяй мы разумеем зборны вобраз беларусаў, якіх аб’ядноўвае імкненне да асабістага шчасця і камфорту за кошт забеспячэння камфорту і дастойнага ўзроўню жыцця грамадства. Самапавага, шанаванне вытокаў і культуры сваёй нацыі, унікальнасці беларускай мовы як адной з важных прыкмет самаідэнтычнасці, адукаванасць, высокі эмацыйны інтэлект і ўзровень культуры ўзаемаадносін, грамадзянская актыўнасць, павага да інтарэсаў суседзяў і здольнасць праз дыялог адстойваць свае інтарэсы – якасці, якія дапамагаюць грамадзянам ствараць грамадства.
Цягам апошніх пяці гадоў самай шчаслівай краінай свету з’яўляецца Фінляндыя. Беларусь на 65 месцы. Новая Беларусь будзе імкнуцца быць сярод самых шчаслівых краін свету.
Рэйтынг краін свету па ўзроўні шчасця (World Happiness Report) – даследчы праект міжнароднай праграмы “Сетка рашэнняў устойлівага развіцця” пры Арганізацыі Аб’яднаных Нацый (UN Sustainable Development Solutions Network), які вымярае паказчык шчасця насельніцтва ў краінах свету.
Пры складанні рэйтынгу ўлічваюцца такія паказчыкі дабрабыту, як узровень ВУП на душу насельніцтва, працягласць жыцця, наяўнасць грамадзянскіх свабод, пачуццё бяспекі і ўпэўненасці ў заўтрашнім дні, стабільнасць сем’яў, гарантыі занятасці, узровень карупцыі, а таксама ўскосныя паказчыкі стану грамадства, такія як узровень даверу, велікадушнасць і шчодрасць.
Місія i задачы
Місія
Місія – адукацыя, гуманізм, еўрапейская будучыня Беларусі
Задачы для пераходнага перыяду
Пад пераходным перыядам мы разумеем час, які працягнецца да моманту ўсталявання дэмакратычнай, а не таталітарнай сістэмы кіравання ў Беларусі. У якасці задач пераходнага перыяду мы бачым стварэнне і рэалізацыю перадумоў для мірнай змены ўлады і захавання незалежнасці Беларусі, у тым ліку праз стратэгію нацыянальнага дыялогу, якая з’яўляецца часткай агульнай камбінаванай стратэгіі «stick and carrot» (ціск на рэжым і дыялог) у супрацы з палітычнымі суб’ектамі, якія ажыццяўляюць гэтыя стратэгіі.
Наша бачанне пераходнай стратэгіі – гэта рашэнне пытанняў, якія маюць дачыненне да беларусаў тут і зараз, у тым ліку: 1) дапамога палітвязням і іх вызваленне; 2) свабоднае перасоўванне беларусаў па свеце; 3) пераадоленне эканамічных цяжкасцяў і стварэнне магчымасцяў для прадпрымальніцтва; 4) магчымасць атрымання альтэрнатыўнай інфармацыі і адукацыі, а таксама непалітычных метадаў уключэння беларусаў у грамадскую павестку і стварэнне ўмоў для нацыянальнага дыялогу па самых важных пытаннях для грамадства.
Мэты для стварэння перамен у Новай Беларусі
Нашымі мэтамі зʼяўляюцца развіццё чалавечага капіталу і адукацыя грамадства, прасоўванне каштоўнасцяў свабоды і дэмакратыі, еўрапейскай будучыні Беларусі.
Ацэнка сітуацыі ў Беларусі
Амаль праз тры гады пасля пратэстаў 2020 года мы з жалем канстатуем наяўнасць працягу масавых рэпрэсій у краіне, павелічэнне колькасці палітвязняў, немагчымасць выказаць палітычную пазіцыю ў Беларусі, знішчэнне свабоднай прэсы, грамадскіх ініцыятыў і праваабаронцаў, масавае перасяленне беларусаў, пагаршэнне эканамічнай, сацыяльнай і палітычнай сітуацый грамадзян унутры краіны.
Накладанне на ўнутраныя праблемы Беларусі расейскай вайны супраць Украіны сур’ёзна нашкодзіла беларусам. Адсутнасць перспектыў для вырашэння праблем, абцяжарванне эканамічнай сітуацыі і штодзённая пагроза большага ўцягвання беларускім рэжымам краіны ў вайну, прыводзяць да дэпрэсіі і адчаю ў грамадстве.
Стратэгія ціску, раней абраная дэмакратычнымі сіламі ў якасці асноўнай ці адзінай, на жаль, не прыводзіць да выхаду з крызісу. На гэтым фоне рэжым спрабуе скарыстацца вайной, гуляючы паміж Расіяй і Украінай, што закранае значную частку ўразлівага беларускага грамадства. З іншага боку, беларусы за мяжой сутыкнуліся з новымі выклікамі, якія выражаюцца ў зменах у стаўленні да беларусаў, цяжкасцях пад час легалізацыі, дыскрымінацыі па нацыянальнай прыкмеце і іншых пытаннях.
Для Беларусі як ніколі пытанне захавання незалежнасці становіцца прыярытэтам.
Відавочна, што галоўным вырашэннем складанай палітычнай сітуацыі ў рэгіёне, у тым ліку і для Беларусі, зʼяўляецца перамога Украіны ў вайне. Гэта не прывядзе аўтаматычна да дэмакратызацыі Беларусі, але дасць магчымасць змяніць рэжым, галоўным донарам якога зʼяўляецца Расія.
Унутры дэмакратычных сіл існуе недахоп новых стратэгій дзеянняў. На фоне адсутнасці невялікіх перамог у дэмакратычнай сферы мы бачым шэраг сурʼёзных праблем, сярод якіх адсутнасць палітычнай дыскусіі па асноўных для нацыянальнай будучыні пытаннях, стратэгіі крызісу, выкарыстанне метадаў прапаганды, недастатковы ўплыў на беларусаў, няпоўнае выкарыстанне патэнцыялу беларусаў замежжа і кадравых праблемах у саміх дэмсілах.
Пры ўсёй складанасці бягучай сітуацыі мы бачым магчымасці, якія існуюць праз новыя варыянты адукацыі, разуменне практыкі механізмаў пабудовы дэмакратыі, унёсак беларусаў замежжа ў дзейнасць па адраджэнні нацыянальнай ідэнтычнасці, салідарнасці і г.д.
Мы спадзяемся, што абноўленая Каардынацыйная рада Беларусі, праз шырокае прадстаўніцтва розных суб’етаў дэмакратычных сіл і грамадзянскай супольнасці, можа стаць платформай, якая абʼяднае розныя галасы, дапаможа распрацаваць адзіную стратэгію і ўзмацніць давер беларусаў.
Рашэнне асноўных праблем дэмакратычных сіл
Мы бачым рашэнне пераважных праблем у прыняцці новай стратэгіі дэмсіл, якая будзе грунтавацца на спалучэнні розных метадаў ціску на рэжым і нацыянальны дыялог. Яны не павінны канкурыраваць, але дапаўняць адзін аднаго і працаваць на агульны вынік. Фактарамі аб’яднання па-ранейшаму застаюцца захаванне незалежнасці Беларусі і вырашэнне неадкладных праблем беларусаў тут і зараз. У гэтым выпадку акцэнт на аб’яднанне беларусаў унутры і за мяжой узмацняецца.
Нацыянальны дыялог беларусаў – гэта працэс, накіраваны на вырашэнне палітычнага крызісу, шляхам пошуку кампрамісаў паміж рознымі сацыяльнымі групамі і палітычнымі сіламі.
Мэтай нацыянальнага дыялогу зʼяўляецца дасягненне пагаднення па асноўных пытаннях адносна будучыні Беларусі, устанаўлення механізмаў прыняцця рашэнняў і кіравання краінай, якія будуць грунтавацца на прынцыпах дэмакратыі, прававой дзяржавы і павазе да правоў чалавека.
Дыялог можа пачацца з так званага “shuttle dialogue”, пры якім намаганні накіроўваюцца на вырашэнне праблем канкрэтных груп беларусаў. Такі дыялог не патрабуе прамога ўзаемадзеяння дзяржаўных і дэмакратычных сіл, выключае іх прамыя перамовы з рэжымам. У гэты перыяд варта весці будаўніцтва і развіццё субʼектаў грамадзянскай супольнасці, якія маюць доступ да абодвух бакоў і могуць быць скарыстаныя ў абмене поглядамі паміж бакамі, каб распрацаваць ідэі і паспрабаваць дапамагчы бакам вызначыць вырашэнні праблемаў, якія задаволяць іх так, што ў выніку гэта будзе на карысць грамадзянам Беларусі.
Такі падыход таксама прадугледжвае будаўніцтва інстытутаў, якія маюць доступ да розных сектараў і суполак беларусаў, якія могуць зразумець і вырашыць патрэбы грамадзян сёння, і якія ў будучыні могуць быць скарыстаныя ў дэмакратычнай Беларусі. На першым этапе прадугледжаны магчымы перанос увагі ад палітычных пытанняў да сацыяльных, вызначэнне прыярытэтных праблем, з якімі сутыкаюцца беларусы ў краіне і за яе мяжой. Такія падыходы неаднаразова выкарыстоўваліся да вырашэння праблем пад час пераходнага перыяду альбо для стварэння міру ў шэрагу краін, калі дыялог пачынаўся з канкрэтных сацыяльных груп і вырашэння пытанняў, якія маюць дачыненне да іх.
На наступным этапе нацыянальны дыялог можа ўключаць палітычны кампанент: грамадскія слуханні, палітычныя дыскусіі, ініцыятывы і дзейнасць, у тым ліку з выкарыстаннем новых тэхналогій і інструментаў. Нацыянальны дыялог зʼяўляецца важным механізмам вырашэння палітычнага крызісу і набліжэння да зменаў. Гэта таксама можа дапамагчы павялічыць легітымнасць дэмакратычных сіл і развіццё грамадзянскай супольнасці ў Беларусі.
У той жа час мы разумеем, што нацыянальны дыялог як адзіная сапраўдная стратэгія не можа быць эфектыўнай і павінна прыменяцца ў спалучэнні розных стратэгіяў, у тым ліку, ціску і санкцый, пры прыняцці ўсімі зацікаўленымі бакамі выкарыстання іншых стратэгіяў і даверы ўдзельнікаў дэмакратычнага працэсу адзін да аднога.
Стратэгія новай Беларусі
Мы таксама лічым важным прадстаўляць на грамадскую думку бачанне новай Беларусі, якую мы хочам будаваць пасля перамен. Мы зыходзім з таго, што:
– Суверэнітэт Беларусі – гэта канстытуцыйная аснова, якая не з’яўляецца прадметам здзелак, абмеркавання або перамоў.
– Палітычная сістэма будучай Беларусі будуецца на прынцыпах дэмакратыі. Мэта палітычнай рэформы – пабудова дэмакратычнай дзяржавы, у якой паважаюцца правы чалавека і закон, і ў якой захоўваецца баланс уладаў неабходны для гэтага.
– Падзел галін улады. Выканаўчая, заканадаўчая і судовая ўлады павінны быць самастойнымі і забяспечваць сістэму стрымак і проціваг.
– Будучыня Беларусі залежыць ад чалавечага капіталу.
Чалавечы капітал
Мы бачым будучую Беларусь інавацыйнай і дынамічнай краінай, якая ведае, як стварыць роўныя магчымасці для развіцця ўсім сваім грамадзянам. Мы бачым, як Беларусь у будучыні знаходзіцца ў авангардзе эканомікі ведаў, прапануе свету таксама ўласныя рашэнні, а не толькі карыстаецца вынаходкамі іншых.
Мы хочам, каб Беларусь была краінай, у якой кожны мае роўныя магчымасці для самарэалізацыі. Мы верым у Беларусь, у якой дабрабыт грамадзяніна, перш за ўсё, залежыць ад яго ўласнага ўнёску і намаганняў. Асновай чалавечага капіталу новай Беларусі з’яўляецца адукаваны і паспяховы сярэдні клас. Каб падтрымаць развіццё талентаў у Беларусі, мы прапануем:
– Пабудову прыватнай сістэмы адукацыі і стымуляцыю інвестыцый у сістэму асветы і навучальныя ўстановы.
– Распрацоўку новых навыкаў будучыні – прадпрымальніцтва, мяккіх навыкаў, лічбавай пісьменнасці і STEM ад школьнай лавы, пасрэдніцтва і зносіны.
– Распрацоўка бесперапыннай сістэмы навучання, міждысцыплінарнай і сучаснай праграмы прафесійнага навучання для рынку працы.
– Стварэнне магчымасцяў у Беларусі для атрымання замежнай адукацыі і абмену вопытам з экзаменам у краіне.
– Актывацыя вывучэння замежных моў у грамадстве.
– Зніжэнне разрыву паміж адукацыйным працэсам і патрабаваннямі рынку за кошт удзелу практыкаў рынку ў адукацыйным працэсе.
– Распрацоўка сістэмы навучання тэхналагічных талентаў (ад універсітэтаў да прыватных адукацыйных ініцыятыў).
Асобна варта адзначыць падтрымку сістэмы здаровых амбіцый новага пакалення ў дасягненні самых розных мэтаў развіцця. Мы часта будуем уласныя памкненні з насцярожанасцю, маючы на ўвазе свае ўражанні аб абмежаванасці ўласных магчымасцяў. Гэта не павінна быць так, бо Беларусь – краіна ўнікальнага чалавечага рэсурсу і адукацыйнага патэнцыялу. Мы можам дасягнуць сваіх амбіцыйных мэтаў, калі будзем развіваць гэты патэнцыял.
Эканамічная мадэль новай Беларусі
Мы прагнем убачыць эканамічную мадэль новай Беларусі, пры якой рост даходаў будзе забяспечаны ў першую чаргу прыватным сектарам. Такая мадэль гарантуе не толькі грамадзянскія, але і эканамічныя свабоды. Яна заснаваная на інавацыйным прадпрымальніцтве і інклюзіўным развіцці.
Беларусы стануць нацыяй з новай мадэллю дзяржавы, якая стымулюе развіццё эканомікі пры дапамозе трох асноўных рычагоў:
- Эканоміка ведаў і развіццё талентаў.
- Інавацыйнае прадпрымальніцтва і прыватны бізнес.
- Лічбавае грамадства.
Гэтая мадэль дазволіць праз развіццё прыватнага сектару эканомікі, малога і сярэдняга бізнесу як асноўнай сілы эканомікі, стварыць дабрабыту ў краіне.
Прыклад краіны наватара ў новай глабальнай канфігурацыі
Мы бачым, што Беларусі у сілу свайго геаграфічнага развіцця, наканавана распрацоўваць і падтрымліваць знешнія сувязі і добрасуседства. Новае беларускае грамадства будзе адкрытым. У яго будуць гарантаваныя права на мабільнасць і магчымасць жыць і працаваць у тым месцы, дзе чалавек лічыць для сябе зручным. Пачуццё прыналежнасці да беларускай нацыі праз гэта толькі ўзмацніцца. Мы ўсе разам беларусы, у сваёй краіне і за яе мяжой.
Мы хочам, каб Беларусь была адкрытая да свету, новых ідэй і змен. Наша краіна можа стаць прыкладам трансфармацыі і інавацый для шэрагу краін, якія перажываюць складаныя перыяды дыктатуры і адсутнасці празрыстасці.
Каштоўнасці, якія аб’ядноўваюць удзельнікаў фракцыі “Шчаслівая нацыя”
Нашыя каштоўнасці вынікаюць з канцэпцыі фракцыі:
- Уласная годнасць, павага і дабрачыннасць. Чалавек, яго правы, патрэбы і магчымасці развіцця з’яўляюцца найбольш важнымі каштоўнасцямі.
- Давер адзін да аднога і дэмакратычна створаных дзяржаўных інстытутаў.
- Свабода і правы чалавека. Дэмакратыя пабудаваная на прынцыпах свабоды, што дазваляе грамадзянам выказваць свае меркаванні і прымаць рашэнні адносна іх жыцця. Мы вольныя. Наша свабода абмежаваная толькі парушэннем правоў іншага. Асноўныя правы чалавека, такія як свабода слова, рэлігіі і сходаў, абароненыя і паважаюцца ў дэмакратычнай дзяржаве.
- Моцная грамадзянская супольнасць. Пачуццё прыналежнасці да беларускай нацыі.
- Эмацыйны дабрабыт – мэтанакіраванасць, пазітыўнае стаўленне і асабістае задавальненне, маюць вырашальнае значэнне для ўласнага шчасця. Мы – нацыя, якая можа быць шчаслівай і імкнецца да гэтага.
- Адкрытасць. Мы адкрытыя для свету, новых ідэй, змен. Мы не ведаем межаў. Мы лёгка перасоўваемся па свеце.
- Нацыянальная годнасць. Мы размаўляем на розных мовах і шануем родную дзяржаўную беларускую.
- Адукацыя: доступ да якаснай адукацыі, міжнароднай шматмоўнай экспертызы, даследаванні і здольнасць вучыцца і расці на працягу ўсяго жыцця – важныя каштоўнасці шчаслівай нацыі.
- Роўнасць розных. Мы розныя і прымаем сябе такімі, якімі мы ёсць. Мы паважаем іншае меркаванне і гатовыя да адкрытых дыскусій. Усе грамадзяне маюць роўныя правы і магчымасці, незалежна ад іх паходжання і статусу.
- Інавацыйная эканоміка, заснаваная на развіцці прыватнага бізнесу, з’яўляецца ключавым кампанентам дэмакратычнай дзяржавы, якая дае грамадзянам магчымасць самаацэнкі, прадпрымальніцтва, росту, фінансавай бяспекі. Мы можам зарабляць грошы і жыць з годнасцю. Мы багатая краіна.
Мы выкарыстоўваем інавацыйныя прадукты і тэхналогіі ў нашым жыцці і працы.
Прапановы фракцыі па агульнай стратэгіі КРБ 2023
Каардынацыйная рада была створана ў жніўні 2020 года як альянс аўтарытэтных прадстаўнікоў беларускага грамадства, здольных выпрацоўваць прапановы па вырашэнні палітычнага крызісу ў краіне. У 2023 годзе КРБ пачынае новы этап развіцця ў абноўленым і пашыраным складзе для вырашэння ўсё тых жа задач па выхаду Беларусі з палітычнага крызісу.
Рэфлексія KР 2020 – 2022
Што атрымалася
Каардынацыйная рада перыяду 2020 – 2022 гадоў стала важнай платформай, якая паказвала беларусам інтэлектуальны і сацыяльны капітал беларускага грамадства. А таксама магчымасць і жаданне людзей з розных сектараў аб’яднацца ў імя вырашэння асноўных задач, падтрымку значнай часткай беларусаў заяўленых мэтаў, і даверу да яе складу, міжнароднага прызнання дэмакратычнай часткі беларускага грамадства, не толькі праз прызнанне дэмакратычнага лідэра, але і больш шырокай каааліцыі дэмсіл, а таксама стабільнасці арганізацыі, нягледзячы на сур’ёзны ціск рэжыму.
Важна адзначыць, што гэта адзіны орган, які створаны дэмакратычнымі сіламі, у каторага ёсць афіцыйнае міжнароднае прызнанне.
Што не спрацавала
– КР была пазбаўленая часткі яе складу праз палітычныя рэпрэсіі.
– КР не змагла развіць міжнародны патэнцыял сваёй дзейнасці.
– КР не змагла аказаць сур’ёзны палітычны ўплыў на фармаванне агульнай стратэгіі і канфігурацыі дэмсіл.
– КР не стала цалкам незалежным палітычным суб’ектам (магчыма, гэта не павінна было адбыцца).
КРБ 2023 зʼяўляецца пераемніцай першага складу Каардынацыйнай рады і можа разлічваць на досвед, экспертызу, урокі і дасягненні папярэдняга складу ў сваёй будучай дзейнасці. Важна зрабіць высновы з памылак і рухацца далей пры падтрымцы дасягненняў і прызнання ролю КР 2020 – 2022 у публічным абмеркаванні. У публічным аналізе памылак важна перайсці ад пошуку вінаватых да канструктыўных прапаноў па будучай стратэгіі KРБ і яе ролю ў вырашэнні палітычнага крызісу.
Важна разумець, што KРБ 2023 – гэта новая структура, якая сурʼёзна саступае аўтарытэту і сацыяльнаму статусу былога складу, але праз дыверсіфікаваны склад удзельнікаў і шырокую рэпрэзентатыўнасць ГА і дэмсіл, можа займаць праактыўную пазіцыю ў распрацоўцы агульнай стратэгіі і стаць абʼяднанай платформай.
КРБ 2023 – гэта ўнікальная платформа для шырокага спектру палітычных і грамадскіх ініцыятыў, якія могуць паслужыць асновай для распрацоўкі агульнай стратэгіі дэмсіл.
Каардынацыйная Рада Беларусі мае магчымасць забяспечыць кансалідаваны працэс распрацоўкі агульнай стратэгіі і павялічыць сваю легітымнасць сярод беларускага грамадства і на міжнароднай арэне. Каардынацыйная роля КРБ заключаецца не ў тым, каб прапанаваць адзіную правільную стратэгію, а каб даць магчымасці розным канкурыруючым меркаванням і стратэгіям існаваць і развівацца ў рамках агульнай стратэгіі.
Каардынацыйная рада Беларусі можа прапанаваць розным палітычным сілам пошукі спосабаў супрацоўніцтва, вырашэння канфліктаў і каардынацыі пагадненняў.
У той жа час процілеглыя погляды, асабістыя інтарэсы і амбіцыі асобных гульцоў уяўляюць пагрозу і могуць пагоршыць рост рознагалоссяў і напружанасці ў дэмакратычных сілах. Гэта ў сваю чаргу, можа падарваць эфектыўнасць і легітымнасць усіх субʼектаў, і разам з імі абноўлены склад КРБ, і паўплываць на тыпы зменаў, да якіх яны імкнуцца на міжнародным узроўні і ў Беларусі.
Мэты KРБ 2023
– Распрацаваць агульную стратэгію дэмсіл, у якой падыходы розных палітычных утварэнняў і грамадзянскіх ініцыятыў па пераадоленні палітычнага крызісу змогуць суіснаваць.
– Забяспечыць баланс сіл паміж рознымі палітычнымі ўтварэннямі і прынцыпам падзелу ўлады сярод дэмсіл.
– Забяспечыць падтрымку ініцыятыў, якія спрыяюць дасягненню больш шырокіх мэтаў дэмакратычных сіл у рамках прынятай стратэгіі і абараняюць інтарэсы беларусаў унутры краіны і за мяжой.
– Узмацніць міжнародную легітымнасць КРБ праз актыўны ўдзел у распрацоўцы міжнароднай павесткі дэмісл і абароны інтарэсаў беларусаў унутры краіны і за мяжой.
– Стаць палітычным утварэннем, здольным весці дыялог для рашэння канфліктаў у рэгіёне і ўрэгулявання нацыянальнага крызісу.
– Стаць платформай для абмеркаванняў, дыскусій і распрацоўкі сумесных ініцыятыў сярод больш шырокага кола палітычных і грамадскіх утварэнняў.
Нашае бачанне стратэгіі KРБ 2023
Мэта КРБ – прапанаваць грамадству адзіную стратэгію дэмсіл, у якой адзінства разумеецца не як адзіны правільны шлях, а як згода на магчымасць выкарыстання розных падыходаў, якія часта канкуруюць паміж сабой у агульнай стратэгіі. Перамога любой з стратэгій у выніку стане агульнай стратэгіяй дэмсіл, а не канкрэтнай палітычнай сілы, якая яе прасоўвае. Такі падыход можа дапамагчы грамадству вярнуць давер да дэмсіл, як да кансалідаванай палітычнай сілы, удзельнікі якой гатовыя да супрацоўніцтва, праяўляюць салідарнасць і павагу адзін да аднаго.
Такім чынам, мы бачым рашэнне бягучага крызісу ў прыняцці новай стратэгіі дэмсіл, якая грунтуецца на спалучэнні розных намаганняў ціску на рэжым і нацыянальнага дыялогу, у той час як яны не канкуруюць, а дапаўняюць адзін аднога і працуюць на агульны вынік.
У той жа час аб’яднаўчым фактарам для ўсіх застаецца незалежнасць Беларусі. А таксама: 1) свабоднае перасоўванне беларусаў па свеце; 2) пераадоленне эканамічных цяжкасцяў і стварэнне магчымасцяў для прадпрымальніцтва; 3) магчымасць атрымання альтэрнатыўнай інфармацыі і адукацыі, а таксама непалітычных метадаў для ўцягвання беларусаў у грамадскую павестку і стварэнне ўмоў для нацыянальнага дыялогу па самых важных пытаннях для грамадства.
Склад фракцыі (12 чалавек)
– Вольга Кавалькова
– Таццяна Марыніч
– Анжэліка Крашэўская
– Стася Гліннік
– Пётр Рудкоўскі
– Аляксандр Кавалёў
– Аліна Яблонская
– Ягор Вярбіцкі
Імёны некаторых удзельнікаў ці ўдзельніц фракцыі схаваны дзеля бяспекі.
Кантакты
Вольга Кавалькова @belarusachkaa (Telegram)
Таццяна Марынiч @tmarinich (Telegram)