Аб’яднанне дэлегатаў КС на аснове наступных пяці прынцыпаў
Мы за дэмакратыю і незалежнасць Беларусі. Краіны, якія жадаюць кантраляваць Беларусь, павінны пакінуць такія амбіцыі пры сабе. Мы за дзеянне міжнароднага права і падтрымліваем барацьбу Украіны супраць расійскай агрэсіі. Мы за еўраатлантычны выбар і еўрапейскую перспектыву Беларусі. Для захавання незалежнасці важна нацыянальнае адраджэнне і развіццё, мы гэта будзем падтрымліваць. Мы за тое, каб Беларусь стала дэмакратычнай краінай, і перыяд паміж пачаткам пераменаў і дэмакратычнымі выбарамі ва ўсе органы ўлады мусіць вымярацца месяцамі, а не гадамі. Тых, хто думае толькі пра змену ўлады, а не пра дэмакратыю, мы да сябе не запрашаем.
Адзінства ў разнастайнасці. Мы розныя, і ў гэтым наша сіла і вялізны рэсурс. Радыкальныя і нерадыкальныя, левыя і правыя, старыя і новыя – гэта мы. Мы цэнім разнастайнасць арганізацый і ініцыятыў дэмакратычных сіл і грамадзянскай супольнасці. Тое, што мы дзейнічаем па розных напрамках – нармальна і правільна. Нам невядома, як спрацуе тое, што мы робім і што паўплывае на сітуацыю больш ці менш. Але мы ведаем, што толькі сістэмныя дзеянні прывядуць да перамогі. Найважнейшымі напрамкамі дзейнасці мы лічым – падрыхтоўку пазітыўнай альтэрнатывы (пакет рэформ і законаў) і стварэнне кадравага рэестра новай Беларусі.
Мы – за кансалідацыю. Захоўваючы сваю аўтаномнасць, кожная ініцыятыва і арганізацыя можа супрацоўнічаць з іншымі, уносячы свой уклад у агульную перамогу. Захоўваючы за сабой і прызнаючы за іншымі права на крытыку, мы будзем садзейнічаць канструктыўнаму супрацоўніцтву розных структур для выпрацоўкі і рэалізацыі агульнай стратэгіі. У кардынацыйнай радзе мы будзем вітаць дужанне ідэй і не будзем вітаць дужанне амбіцый. Канфлікты – гэта нармальна, але пры гэтым важна выяўляць і дазваляць іх у духу ўзаемнай павагі. Дзеля агульнай справы мы не будзем падтрымліваць спробы аспрэчваць легітымнасць і лідэрства Святланы Ціханоўскай ці спробы лаяцца з Аб’яднаным пераходным кабінетам ці любой іншай дэмакратычнай арганізацыяй, дапускаючы крытычнае стаўленне да іх. Тых, хто думаюць пра свае амбіцыі і сваю палітычную кар’еру, ставячы іх вышэй за агульныя мэты, мы не будзем вітаць у нашых шэрагах.
Мы – за дзеянне і адказнасць. Важна дзейнічаць для дасягнення агульных мэт і ў рамках агульнай стратэгіі. Таму мы будзем садзейнічаць выпрацоўцы агульных стратэгічных дакументаў.
Мы разумеем, што КС-гэта не класічны парламент. Мы новы цэнтр палітычнай улады. Мы частка аднаго цэлага, што супрацьстаіць нелегітымнаму, хвораму на ўладу рэжыму, які завёў краіну ў тупік і ўцягнуў Беларусь у вайну.
Мы за тое, каб КС дакладна вызначыў зону сваёй адказнасці і дзейнічаў у межах сваёй кампетэнцыі і сваіх магчымасцей.
Розніца палітычных пазіцыяў стане важнай пасля першых дэмакратычных выбараў. Да гэтага важна быць кансалідаванымі. Мы лічым, што першыя дэмакратычныя выбары мы павінны выйграць разам, не дапусціўшы рэваншу дыктатуры. Для гэтага ў дэмакратычным руху трэба дзейнічаць узгоднена. Па палітычных поглядах многія сябры нашай фракцыі – правацэнтрысты. Гэта значыць зыходзім з таго, што самая галоўная крыніца для развіцця краіны – ініцыятыва людзей, іх жаданне і ўменне працаваць, свабода і вяршэнства права. Але мы будзем рады, калі да нас далучацца людзі іншых палітычных поглядаў, якія падзяляюць дэмакратычныя каштоўнасці. Агульная справа зараз важнейшая.
Нашы асаблівасці
Мы стартуем не з нулявой адзнакі.
Мы-працяг фракцыі “Грамадзянскае дзеянне” Вярхоўнага Савету 13 скліканьня, апошняга дэмакратычна абранага Парлямэнту Беларусі. Фракцыі прафесара Станіслава Багданкевіча, акадэміка Генадзя Карпенка, Віктара Ганчара, першага кіраўніка незалежнай Беларусі Станіслава Шушкевіча. Фракцыі, якая ў аграрна-камуністычным Парламенце ініцыявала і прыняла пакет эканамічных рэформаў, якая запусціла імпічмент Лукашэнкі.
У нашай фракцыі два дэпутаты ВС 13 склікання Аляксандр Дабравольскі і Павел Данэйка і якія маюць вопыт мясцовага самакіравання Юрый Губарэвіч, Алесь Міхалевіч і Галіна Мацюшына (Антверпен, Бельгія).
Вышэй адзначанае дае падставу казаць аб фракцыі, як аб камандзе прафесіяналаў з унікальным вопытам і ведамі.
Нашы каштоўнасці
Нашы каштоўнасці падрабязна і сістэмна распісаны, выкладзены ў праграмах “Мільён НРМ” і Народнай праграме. Гэта дакладныя зразумелыя рэформы, з якімі можна азнаёміцца ўжо зараз. Гэта не адказ на ўсе пытанні, але гэта добрая аснова для таго, каб дыскутаваць і рухацца наперад.
Пры гэтым нашае з’яўленне не звязанае з рашэннямі ніякай палітычнай партыі.
Такім чынам, нашы галоўная асаблівасць і годнасьць – ПРАФЭСІЯНАЛІЗМ І АДКАЗНАСЦЬ.
Ужо сёння фракцыя мае грунтоўную каманду падтрымкі (група дарадцаў і кансультантаў), што дазваляе рашаць самыя амбіцыйныя задачы.
Тых, хто падзяляе нашыя каштоўнасці і погляды, хто хоча працаваць у прафесійнай камандзе, запрашаем да нас!