КОТГС-98 з’явіўся месяц таму як ініцыятыва, якая ў далейшым мае перарасці ў афіцыйны КОТГС. Стварыць КОТГС-98 актыўныя мінчукі вырашылі, «як толькі з’явілася інфармацыя, што існуе законная магчымасць праяўляць грамадзянскую ініцыятыву: мерапрыемствы, добраўпарадкаванне, сустрэчы, сумеснае рашэнне праблем, пошук аднадумцаў ды іншае».
За першыя два тыдні ініцыятыва аб’яднала 15 актывістаў, якія адразу сутыкнуліся з перашкодамі. «Першаадкрывальнікам цяжка, асабліва калі дзверы для нас зачынілі і дзеючы КОТГС (не вядзе прыём людзей насуперак усталяванаму графіку: павінны тры разы на тыдзень), і адміністрацыя раёна».
Нягледзячы на перашкоды, ініцыятыва па самакіраванні расце: людзі ствараюць чаты кожнага дома, арганізуюцца для вырашэння жыллёва-камунальных пытанняў (запушчаныя пад’езды, адсутнасць асвятлення двароў і многае іншае).
«Ініцыятыва @kotos98, як і іншыя ініцыятывы, не трымаецца нейкай адной палітычнай ідэалогіі, парог уваходу — усе жыхары. Мы хочам рэалізацыі нашых законных правоў і інтарэсаў. Калі якая-небудзь з дзяржструктураў парушае нашыя правы або нас не чуе, ігнаруе, то мы прымаем меры па аднаўленні нашых правоў».
Стварайце КОТГСы і самі абірайце сваю мясцовую ўладу, якая будзе дзейнічаць у інтарэсах людзей.
Усе інструкцыі і падтрымку па фарміраванні КОТГСаў вы знойдзеце на сайце kotos.org
