Мы не можам сядаць за стол перамоваў, пакуль нашых сяброў забіваюць або трымаюць у закладніках.
Каардынацыйная Рада ўпэўненая, што круглы стол можа быць адным з інструментаў для развязання палітычнага крызісу, але не самамэтай. Мы мяркуем, што круглы стол можа быць эфектыўным у развязванні палітычнага крызісу толькі пры ўмове, што:
– Бакі абмяркоўваюць пытанні, якія ўзаемна прызнаюцца ў якасці найбольш праблемных, важных і якія падлягаюць абмеркаванню.
– Кожны з бакоў публічна вызначыў сваіх прадстаўнікоў у перамовах, іх паўнамоцтвы і гатоўнасць рэалізоўваць дасягнутыя дамоўленасці.
Арганізацыя круглага стала суб’ектамі, якія самаабвясцілі сябе прадстаўнікамі дэмакратычных сілаў, не адпавядаюць ніводнаму з названых умоваў. Удзельнікамі гэтых перамоваў з’яўляюцца людзі, якія не атрымалі ніякіх паўнамоцтваў ні ад грамадства, ні ад улады. Усе “рашэнні” ў рамках такіх круглых сталоў будуць адлюстроўваць толькі інтарэсы іх удзельнікаў.
КР упэўненая, што падобны круглы стол – імітацыя дыялогу з грамадствам. Гэта толькі спроба заглушыць патрабаванні, у дачыненні да якіх склаўся шырокі грамадскі кансэнсус: спыненне гвалту і пакаранне вінаватых у ім, вызваленне ўсіх палітычных зняволеных, новыя выбары. У такім выглядзе Каардынацыйная Рада не можа і не будзе браць удзел ні ў якім круглым стале.
Мы застаёмся прыхільнікамі развязання палітычнага крызісу шляхам перамоваў. Аднак для таго, каб палітычны крызіс сапраўды мог быць развязання,, папярэдне мае быць узгоднены пералік пытанняў, а таксама маюць быць пацверджаныя паўнамоцтвы ўдзельнікаў і іх адказнасць за імплементацыю вынікаў. І апошняе: найважнейшай перадумовай для пачатку перамоваў з’яўляецца вызваленне ўсіх палітычных зняволеных. Мы не можам сядаць за стол перамоваў, пакуль нашых сяброў забіваюць і трымаюць у закладніках.
