За два дні за заклік Святланы Ціханоўскай пра дыялог паміж цяперашняй уладай і беларускім грамадствам прагаласавала больш за паўмільён беларусаў.
— Зварот Святланы Ціханоўскай ізноў актуалізуе пытанне перамоў у палітычным парадку дня. Гэта дзеянне падкраслівае і нязменную пазіцыю Каардынацыйнай рады, што палітычны крызіс у Беларусі можа быць вырашаны толькі праз дыялог і выключна мірнымі сродкамі, — скаментаваў дырэктар Цэнтра еўрапейскай трансфармацыі, сябра КР Андрэй Ягораў. – Дынаміка галасавання на платформе «Голас» паказвае, што ініцыятыва Святланы Ціханоўскай мае масавую падтрымку беларусаў. Гэты факт таксама пацвярджае, што нас па-ранейшаму шмат і мы па-ранейшаму выступаем за мірныя перамены.
На думку Андрэя Ягорава, беларускія ўлады, найхутчэй, праігнаруюць прапанову пра перамовы, але яно прымусіць задумацца многіх службоўцаў і сілавікоў.
— Святлана Ціханоўская прапануе дыялог і прымірэнне, а ўлады, не прымаючы гэтай прапановы, прапануюць працяг канфлікту і вайну з тымі, хто выступае за перамены.
Пры гэтым Андрэй Ягораў кажа, што, нават заручыўшыся падтрымкай міжнародных арганізацый, пытанне дыялогу паміж беларусамі будзе развязвацца толькі ўнутры Беларусі.
– Сёння нам усім стаіць падумаць, што кожны з нас можа зрабіць, каб гэты дыялог адбыўся, – рэзюмуе Андрэй Ягораў.
Пацвердзіце сваё жаданне вырашыць канфлікт мірным шляхам праз платформу «Голас». Дапамажыце блізкім таксама выказаць сваю думку. Дзякуй!
